Skip to content
يوليو 2, 2009 / Ahmad

المسلسلات الجديده لموسم2009\2010

1372944304_94829ad435_o

ماراح اتكلم عن المسلسلات اللي تجددت لموسم جديد، بتكلم عن مسلسلات جديده حاط عيني عليهم هالصيف.

ادخل لمشاهده ما أنتظره في خريف 2009


Flash Forward

احب مسلسلات الخيال العلمي واللي تتكلم عن ظاهره غريبه، يمكن هذا اللي يخليني أحب هيروز، ويمكن هو ايضاً السبب اللي خلاني استحمل جيريكو اللي اصبح ممل شويه لكن الاتموسفير في الحلقات الأولى كان روعه واتمنى تطلع حلقات تعيد هالشي، استثني من الخيال العلمي الاشياء اللي عن الكائنات الفضائيه أو السفر الى الفضاء، ممله جداً بالنسبه لي.

عموماً، Flash Forward هو من أكثر المسلسلات اللي متحمس لها، قصته واعده وباين عليه انه بيكون مشوّق، وهي انه في يوم من الأيام، ولمده دقيقتين و 17 ثانيه العالم كله فقد الوعي وشاف احداث من المستقبل، عموماً، بما اني ما أعرف اشرح القصص عدل فأترككم مع البرومو:


The Wonderful Maladys

السبب الوحيد اللي يخليني اتحمس لهالمسلسل هو انه بطلته هي Sarah Michelle Geller ( وهي Buffy من المسلسل المشهور Buffy The Vampire Slayer ) ماعندي فكره عن المسلسل، بصراحه، قريت عنه من فتره وعن قصته بس نسيتها مع الوقت –_-“ وللأسف مافيه برومو للمسلسل، مجرد صور لمكان تصوير الفيلم و ساره موجوده تمثل ( واللي من الصور كانت باينه أحلى من قبل! )

V

مو متحمس له كثير، ولكن حاط عيني عليه، اللي خايف منه هو الكائنات الفضائيه والسخافه اللي عاده تجي من أي فيلم\مسلسل\فيديو جيم يكونون فيها، أتمنى يكون هالمسلسل غير، خصوصاً انه له نسخه قديمه وهذا تجديد له، لذا أعتقد انه ممكن يطلع منه، هذا برومو له يشرح القصه عدل:


Cougar Town

اللي يحمسني له هو ان Courtney Cox هي البطله ( مونيكا في فريندز ) وايضاً باين من شكله انه بيكون ممتع ومسلي، ومن البرومو شكله بيكون مضحك بعد، القوا نظره 😀 :


Glee

دراما المراهقين لازم يكون لها وقت من متابعتي، وهذا على طول دخل بمزاجي لإنه من الناس اللي سوو popular، أول حلقه من المسلسل انعرضت في شهر مايو، أما باقي الحلقات فـ بتنعرض في شهر سبتمبر 2009 ، المسلسل شكله واعد، لكن بنفس الوقت حاس انه راح يتكنسل بعد الموسم الأول او الثاني، عموماً هذا برومو له :


انتهت اللسته مالتي، بعض المسلسلات اللي فوق بطالعهم في وقتهم من العرض، والآخر بنتظر الى أن ينتهي أو يوصل لعدد حلقات كبير وأبدأ اتابعه، فيه غيره من المسلسلات الموجوده لكن من البرومو مالهم ماعجبوني، يمكن يحصلون انطباعات حلوه أتابعهم ولكن الى الآن مو متحمس.. الله يعين على هالسنه، مسلسلات كثيره بتابعهم في وقتهم : Heroes, Grey’s Anatomy, Desperate Housewives, Damages, Dexter, Ugly Betty, Gossip Girl, 90210 وغيرهم اللي ما أتذكرهم بالأضافه لبعض من اللي فوق. مع إني ضد مشاهده مسلسلات كثيره مع بعض، لكن هالسنه بيكون فيه اشياء روعه وما أقدر انتظر الى ان ينتهي عرضه علشان اطالعه.

Advertisements

8 تعليقات

اكتب تعليقُا
  1. Just Human / يوليو 3 2009 3:03 ص

    ماشاء الله عليك تتابع مسلسلات واجد .. و بعضها نوعيتها دراميه و هذا ما ابعد عنه .. تصدق اني ما شفت في حياتي سوى مسلسل 24 بكامل مواسمه اضافه الى جيريكو بموسميه .. و شفت حلقات متفطعه من هيرورز .. و اسمع في لوست و يرزون بريك و الشله الباقيه .. لان المسلسلات وضعها صعب على عكس الافلام ..فهي من عدة حلقات و و تتفرع لمواسم عدة .. و هذا مما يأخذ وقت وجهد .. لذلك افضل اثبت على مسلسل واحد و اللي هو 24 .. و بقية المسلسلات يمكن الوحد يتفرغ لها اذا في مزاج رايق و مافي شيء يعكره .. و هذا الشيء ما صار لي من وقت طويل ..

    أقول مو كأني صرت ضيف ثقيل على مدونتك ؟ 🙂

  2. Ahmad / يوليو 3 2009 3:34 ص

    لأ بالعكس، اعجبني وجودك في المدونه، لي الشرف في زيارتك.

    بالنسبه للمسلسلات، قبل كنت انظر لها بنفس النظره، انها طويله وراح تاخذ مني وقت كبير، لكن بعد ماصرت اتابع مسلسلات أكثر، صرت ابتعد اكثر واكثر عن الأفلام، الحين صرت نادراً ما أشوف فيلم. المسلسلات بالنسبه لي أفضل، تعطيك مده للتعرف على الشخصيات، تعيش معاهم، تشوفهم شلون تتطور شخصياتهم، الأحداث بتتنوع بشكل أكبر من الأفلام، الأفلام تتيح لك ساعتين فقط للتعرف على الشخصيه، بعدين كم حدث وبعدين تصير النهايه، ما أنكر انه الأفلام حلوه وفي أفلام فعلاً تدخلك جو مع شخصياتها، لكن المسلسلات تعطيك قدره أكثر على العيش مع الشخصيات والتأثر مع الأحداث اللي تصيرلهم.

    حاول تعطي فرصه للمسلسلات، انصحك تجرب مشاهده هالمسلسلات كبدايه يمكن يعجبوك، استثنيت الدراما ( أستغرب انك ماتطالعها، الدراما موجوده في حياه كل انسان، وهي تخليك تشاهدها براحه بال وبعيداً عن الاثاره والبيئه المظلمه) حاول تشوف هذي : Dexter, Damages, Harper’s Island كلهم ممتازين، وكلهم بيدخلونك جو معاهم، والأهم انهم كلهم عدد حلقاتهم قليل، اما هاربر ايلاند فهو موسم واحد ينتهي بعد اسبوع، لذا ممكن يعجبك بما انك ماتحب كثره المواسم.

    وخذ راحتك في المدونه، دائماً كنت اشوفك تكتب في احد المدونات عن الكتب ( نسيت اسمها -_-” ) واستمتعت لما قريت اسمك في مدونتي، حياك الله دائماً 🙂

  3. Abdulrhman / يوليو 3 2009 2:09 م

    قلت باتابع Glee لانك قلت بانهم نفسهم اللي انتجوا Popular ، لكن شفت التريلر وحسيته شي اقل من العادي ، طاقم تمثيل مبين عليه بايخ و الفكرة مررررررررة مكررة و قديمة …. الا لو تم تقديمها بشكل جيد ما ادري ، باطل على imdb و wiki يمكن القى انطباعات ومراجعات ونحوه .

    • Ahmad / يوليو 3 2009 2:36 م

      صحيح الفكره شوي مستهلكه، لكن من انطباعات الناس من الحلقه الأولى مبشره، راح احاول انزل الحلقه الأولى هاليومين، لكن أخاف اتعلق معاه واتوهق في الانتظار على مايبدأ فعلياً :\

  4. Just Human / يوليو 3 2009 3:55 م

    ديكستر سمعت عنه .. و يمكن اشوفه في وقت لاحق .. بس مشوار 4 مواسم 🙂

    بالنسبه للموقع فأنت تقصد ” نادي إقرأ ” 🙂

    ما توقعت احد راح يتذكر اسمي .. على العموم ترا انا معاك في اكسيزيا 🙂

    و هذه عادتي اقتحم على الناس في مدوناتهم 🙂

    • Ahmad / يوليو 3 2009 4:19 م

      الموسم الرابع للحين مابدأ، وكل موسم تقريباً 12 حلقه، لذا يمديك تتابعه 🙂

      انت موجود في اكسيزيا؟ ماعرفتك، شنو اسم عضويتك هناك؟

      أوكي بعد التفكير جاء ببالي كازوما أو شي مثل جذي، صح؟

  5. koko / أكتوبر 15 2009 8:45 ص

    فعلا المسلسلات اكثر متعه من الافلام
    ياليت نشوف تقرير عن 4400
    مسلسل رائع جدا انا تابعته ^^
    و اكيد انك شفته ^ ـ ^

    • Ahmad / أكتوبر 15 2009 1:57 م

      لا والله للأسف ماشفت المسلسل. اتذكر حطوه على قنوات MBC وأخوي كان يمدحه لي، بس ماحصلي وقت.

      تنصحني اشوفه؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: